मुम्बई । मुम्बईमा भएको डुंगा दुर्घटनामा मृत्यु हुनेको संख्या १५ जना पुगेको छ । मृत्यु हुनेमा आठ पुरुष, चार महिला र तीन बालबालिका रहेका छन् ।
दुर्घटनामा परेका दुई जना अझै बेपत्ता छन् । भौचाढाक्कामा ४३ वर्षीय हंसराम भाटीको शव फेला परेको छ । यसैगरी मुम्बई हार्बरमा शनिबार सात वर्षीय बालकको शव फेला परेको थियो । योसँगै मर्नेको संख्या १५ पुगेको हो ।
यसअघि बुधबार भएको दुर्घटनाको जानकारी दिँदै महाराष्ट्रका मुख्यमन्त्री देवेन्द्र फडणवीसले दुर्घटनामा १३ जनाको मृत्यु भएको बताएका थिए । उनले मृतकका परिवारलाई ५/५ लाख रुपैयाँ आर्थिक सहयोग गर्ने घोषणा समेत गरेका छन् । राष्ट्रपति द्रौपदी मुर्मु र प्रधानमन्त्री कार्यालयले पनि दुर्घटनाप्रति दुःख व्यक्त गरेका छन ।
प्रधानमन्त्री कार्यालयले मृतकका परिवारलाई प्रधानमन्त्री राहत कोषबाट दुई लाख रुपैयाँ आर्थिक सहयोग गर्ने घोषणा गरेको छ । घाइतेलाई ५० हजार रुपैयाँ सहयोग गरिनेछ ।
नौसेनाको स्पीडबोट फेरीसँग ठोक्किएपछि यो दुर्घटना भएको हो । यो डुंगा मुम्बईको गेटवे अफ इन्डियाबाट एलिफेन्टा आइल्याण्ड जाँदै थियो । डुंगामा करिब ८० जना सवार थिए ।
