काठमाडौँ । सङ्घीय संसद्को सबैभन्दा ठूलो दल नेपाली कांग्रेसको संसदीय दलको नेता चयनका लागि आज मतदान हुँदैछ ।
बिहान ८ बजे समय तोकिए पनि अझै मतदान सुरु हुन सकेको छैन । मतदानका क्रममा मतदातालाई बुथमा मोबाइल लैजान दिने कि नदिने भन्ने विवाद हुँदा मतदान ढिला भएको हो ।
संस्थापन पक्षका उम्मेदवारसमेत रहेका सभापति शेरबहादुर देउवा पक्षले आफूलाई मत हालेको तस्बिर खिचेर ल्याउन निर्देशन दिएको बताइएको छ । निर्वाचन समितिमा भीष्मराज आङ्देम्बे संयोजक, पुष्पा भुसाल र प्रकाश रसाइली सदस्य रहेका छन् ।
संसदीय दलको नेतामा प्रधानमन्त्री एवं पार्टी सभापति शेरबहादुर देउवा र पार्टीका महामन्त्री गगनकुमार थापाले उम्मेदवारी दिएका छन् ।
