काठमाडौं । पुस्तान्तरण र राजनीतिमा युवाको हस्तक्षेप हुनुपर्ने बहस भइरहँदा सचेत मतदाता रहेको काठमाडौं उपत्यकाका १६ निर्वाचन क्षेत्रमा तीन ठूला दलमा १६ नै नयाँ अनुहारले अवसर पाएका छन् । गठबन्धनका कारण आफूले पाएको सिटमा कांग्रेसबाट सबैभन्दा कम नयाँ अनुहारको प्रतिनिधित्व भएको छ । उम्मेदवार छनोटमा मतदाताको भावनाअनुसार प्रतिनिधित्व भएको देखिन्न ।
एमालेले काठमाडौंका १० मध्ये ६ क्षेत्रमा सबैभन्दा धेरै नयाँ अनुहारलाई अघि सारेको छ । एमालेले हालसम्म संसदीय निर्वाचनमा उम्मेदवार नबनेका भक्तपुरमा १ र ललितपुरमा २ जनालाई अघि सारेको छ । कांग्रेसले गठबन्धनका कारण काठमाडौंमा ६ क्षेत्रमा उम्मेदवारी दिएकामा २ जना मात्र नयाँ अनुहार परेका छन । भक्तपुरमा १ जना नयाँले अवसर पाएका छन् । माओवादीले काठमाडौंमा ३ र भक्तपुरमा १ जनालाई नयाँ अनुहारको रूपमा अघि सारेको छ ।
कांग्रेसले काठमाडौंमा प्रतिनिधिसभाका १० मध्ये क्षेत्र नम्बर १, ३, ४, ५, ६ र १० गरी ६ वटा निर्वाचन क्षेत्रमा उम्मेदवार उठाएको छ । जसमा ४ क्षेत्रमा पुरानै अनुहार छन् । काठमाडौं–१ मा एमालेका युवा किरण पौडेल नयाँ अनुहार मानिनुहुन्छ । उहाँ एमाले भातृसंस्था युवा संघका अध्यक्ष पनि हुनुहुन्छ । कांग्रेसका उम्मेदवार प्रकाशमान सिंह गठबन्धनको साझा उम्मेदवार हो । उहाँ त्यही क्षेत्रबाट जित्नुभयो भने ह्याट्रिक हुनेछ । २०७४ को निर्वाचनमा सिंह यही क्षेत्रबाट तत्कालीन साझा पार्टीका रवीन्द्र मिश्रसँग ८ सय १८ मतले विजयी हुनुभएको थियो । मिश्र अहिले राष्ट्रिय प्रजातन्त्र पार्टीबाट प्रतिनिधिसभा सदस्यको उम्मेदवार हुनुहुन्छ । यो क्षेत्रमा स्वतन्त्र र नयाँ पार्टी खोलेका नयाँ अनुहारको बाक्लो उपस्थिति छ ।
काठमाडौं–२ मा एमालेका मणिराम फुर्याँल नयाँ अनुहार हो । गठबन्धनको साझा उम्मेदवार माओवादीकी ओनसरी घर्ती यो क्षेत्रका लागि नयाँ अनुहार भए पनि संविधानसभा र संसदमा पटक–पटक प्रतिनिधित्व गर्दै आउनुभएको छ ।
कांग्रेसका सन्तोष चालिसे काठमाडौं–३ मा नयाँ अनुहार हुनुहुन्छ । उहाँका मुख्य प्रतिस्पर्धीमध्ये एमालेका कृष्णकुमार राई र स्वतन्त्र उम्मेदवार छन् । काठमाडौं–५ मा प्रदीप पौडेल कांग्रेसका नयाँ अनुहारमा प्रकट हुनुभएको छ । उहाँलाई एमालेका वरिष्ठ उपाध्यक्ष ईश्वर पोखरेलले टक्कर दिनुभएको छ । पोखरेल यसअघि सोही क्षेत्रबाट प्रतिनिधिसभामा निर्वाचित हुनुभएको थियो । पटक पटक मन्त्री हुनुभएका पोखरेल एमालेका वरिष्ठ उपाध्यक्ष हुनुहुन्छ ।
काठमाडौं–४ मा मुख्य दलका उम्मेदवार पुरानै अनुहारका छन् । कांग्रेसका गगन थापा र एमालेका राजन भट्टराईबीच दोस्रो पटक प्रतिस्पर्धा हुँदैछ । काठमाडौं–६ मा मुख्य दल एमालेका सर्वेन्द्र खनाल नयाँ अनुहार हो । उहाँ पूर्वप्रहरी महानिरीक्षक समेत रहेका खनाल र कांग्रेसका भिमसेनदास प्रधानबीच प्रतिस्पर्धा हुँदैछ ।
काठमाडौं–७ मा माओवादी केन्द्रको चिन्हबाट मानुषी यमी भट्टराई नयाँ उम्मेदवार हुनुहुन्छ । एमालेका श्यामकुमार घिमिरे पनि नयाँ अनुहार हो । काठमाडौं–८ मा एमालेले शिव सुन्दरराज वैद्यलाई उम्मेदवार बनाएको छ । उहाँ मतदाताको पहिलो कसीमा हुनुहुन्छ । एकीकृत समाजवादीले जीवनराम श्रेष्ठलाई उम्मेदवार बनाएको छ । काठमाडौं–९ मा गठबन्धनको तर्फबाट कल्पना धमला उम्मेदवार हुनुुहुन्छ । शर्मालाई एमालेका कृष्णगोपाल श्रेष्ठले टक्कर दिनुहुनेछ ।
काठमाडौं–१० मा एमालेले उठाएको उम्मेदवार हिमेश केसी नयाँ अनुहार हो । कांग्रेसले भने राजेन्द्र कुमार केसीलाई उम्मेदवार बनाएको छ ।
ललितपुर–१ मा एमाले र कांग्रेसका पुरानै अनुहारबीच प्रस्पिर्धा हुने छ । कांग्रेसले उदयशम्शेर राणा र एमालेले नवराज सिलवाललाई उम्मेदवार बनाएको छ । क्षेत्र नम्बर २ मा गठबन्धनबाट एकीकृत समाजवादीले कृष्णलाल महर्जन र एमालेले प्रेमबहादुर महर्जनलाई उम्मेदवार बनाएको छ । प्रेमबहादुर पहिलोपल्ट जनताको अग्निपरीक्षा होमिनुभएको छ । ललितपुर–३ मा एमालेका अमृत खड्का र माओवादी केन्द्रकी पम्फा भूसाल उम्मेदवार रहनुभएको छ ।
भक्तपुर–१ मा भने गठबन्धनबाट माओवादीले सुनील गोठेलाई नयाँ अनुहारका रूपमा अघि सारेको छ । नेपाल मजदुर किसान पार्टीबाट प्रेम सुवाललाई उम्मेदवार बनाइएको छ । नेमकिपाको प्रभाव मानिएको क्षेत्रमा गोठेलाई कांग्रेस र एकीकृत समाजवादीको समर्थन छ । उक्त क्षेत्रमा एमालेले नवराज गेलाललाई उम्मेदवार बनाएको छ । भक्तपुर–२ मा कांग्रेसले दुर्लभ थापालाई नयाँ उम्मेदवारको रुपमा अघि सारेको छ । यो क्षेत्रमा एमालेले महेश बस्नेतलाई उम्मेदवार बनाएको छ ।
सन्दीपकुमार श्रेष्ठ
