झापा ।
कुटपिटबाट श्रीमतीको मृत्यु भएको भन्ने मौखिक उजुरीपछि सोमबार कनकाई माईको घाटमा दाहसंस्कार गर्न ल्याक्ष्एको शवलाई प्रहरीले नियन्त्रणमा लिएको छ ।
कनकाई नगरपालिका ३ सुरुङ्गाकी ३२ वर्षीया पुजा कोचकारको उपचारका क्रममा आज सोमबार कञ्चनजंघा अस्पताल बिर्तामोडमा मृत्यु भएको थियो । घरमा अरुब्ला समेत झगडा परिरहने भएकोले श्रीमान र जेठी श्रीमतीको कुटपिटबाट कान्छी श्रीमतीको मृत्यु भएको हुनसक्ने भन्दै स्थानीयले प्रहरीमा उजुरी गरेका थिए ।
स्थानीयको उजुरीसँगै इलाका प्रहरी कार्यालय बिर्तामोडको प्रहरी टोलीले मृतक कोचकारको शवलाई जलाउन तयारी अवस्थामा थप अनुसन्धानका लागि लगेको हो ।
स्थानीयको मौखिक उजुरीपछि शवलाई पोस्टमार्टमका लागि मेची प्रादेशिक अस्पताल भद्रपुर पठाइएको इलाका प्रहरी कार्यालय बिर्तामोडका प्रहरी प्रमुख प्रहरी नायव उपरीक्षक सुरज कार्कीले बताए ।
यता कञ्चनजंघा अस्पताल बिर्तामोडका डाक्टर प्रमोदकुमार शाहले उपचारका लागि ल्याइएकी पुजाको लिभरमा ज्यादै समस्या देखिएर अन्तिम अवस्थामा ल्याएको र सोही कारण उपचारका क्रममा मृत्यु भएको बताएका छन् ।
घर निर्माणको ठेक्कापट्टासम्बन्धि काम गर्दै आएका कनकाई नगरपालिका ३ निवासी ५० वर्षीय चोपेन्द्र कोचकारका २ श्रीमतीमध्ये मृतक कान्छी श्रीमती हुन् । उनीहरुका १० वर्षीय छोरा रहेको छ ।
