काभ्रेपलाञ्चोकको भकुण्डेवेशीस्थित प्रहरी चौकीका इन्चार्ज प्रहरी नायब निरीक्षक (सई) गणेशकुमार श्रेष्ठ र एक युवतीबीचको भिडिओ सार्वजनिक तथा सामाजिक सञ्जालमा फैलाइएको घटनामा जाहेरी दर्ता भएको छ।
आफ्नो वैयक्तिक गोपनीयतामा गम्भीर आँच पुगेको भन्दै पीडित युवतीले जिल्ला प्रहरी कार्यालय काभ्रेमा जाहेरी दिएकी हुन्।अनुमति बिना भिडिओ खिचेर सामाजिक सञ्जालमा सार्वजनिक तथा प्रसार गरिएको भन्दै युवतीले गोपनीयताको अधिकार उल्लंघन भएको दाबी गरेकी छन्।
जाहेरी परेपछि प्रहरीले भिडिओ अनधिकृत रूपमा खिच्ने, सार्वजनिक गर्ने तथा सामाजिक सञ्जालमा फैलाउने व्यक्तिहरूमाथि फौजदारी कसुरअन्तर्गत अनुसन्धान थालेको छ। जिल्ला प्रहरी कार्यालय काभ्रेका प्रवक्ता एवं प्रहरी नायब उपरीक्षक (डीएसपी) रविन विष्टले युवतीको जाहेरीका आधारमा अनुसन्धान अघि बढाइएको जानकारी दिएका छन्।
प्रहरीले भिडिओ कसले खिचेको, कसरी सार्वजनिक भयो र सामाजिक सञ्जालमा कस–कसले प्रसार गरे भन्ने विषयमा अनुसन्धान गरिरहेको जनाएको छ।
