भीषण बाढीका कारण प्रभावित २१६ मेगावाटको माथिल्लो त्रिशूली–१ जलविद्युत् आयोजनाको अडिट–४ टनेलमा फसेका एक जना चिनियाँ नागरिकको बाढी गएको ११ औँ दिनमा जीवितै उद्धार गरिएको छ। नेपाली सेना र दक्षिण कोरियाको विपद् व्यवस्थापन विशेषज्ञ टोलीको संयुक्त प्रयासमा आज उहाँलाई टनेलबाट सकुशल बाहिर निकालिएको हो।
नेपाली सेना र कोरियाली विज्ञ टोलीको संयुक्त अपरेसन
भोटेकोशी र त्रिशूली नदीमा भदौ १० गते आएको विनाशकारी बाढीपछि जलविद्युत् आयोजनाको सुरुङभित्र फसेका ती चिनियाँ नागरिकको खोजी र उद्धारका लागि नेपाली सेना र दक्षिण कोरियाली टोलीले लगातार जटिल अपरेसन सञ्चालन गरिरहेका थिए। कठिन प्राविधिक चुनौतीका बिच ११ औँ दिनमा उहाँलाई जीवितै उद्धार गर्न सफलता मिलेको छ।
मैथिल ब्यारेक लगिँदै, स्वास्थ्य उपचार प्रारम्भ
उद्धार गरिएका चिनियाँ नागरिकलाई थप स्वास्थ्य परीक्षण र प्राथमिक उपचारका लागि नुवाकोटको त्रिशूलीस्थित नेपाली सेनाको मैथिल ब्यारेकमा ल्याइँदैछ। ११ दिनसम्म सुरुङभित्रै अड्किएका कारण उहाँको स्वास्थ्य स्थितिबारे चिकित्सकहरूले निगरानी सुरु गरेका छन्।
आयोजनास्थलबाट बेपत्ता भएका अन्य व्यक्तिहरूको खोजी कार्यमा पनि नेपाली सुरक्षा निकाय र अन्तर्राष्ट्रिय उद्धार टोली निरन्तर खटिरहेका छन्।
