डिएलए महासचिवका लागि रविन्द्र प्रधानको देश दौडाहा, ‘अनुभवलाई नेतृत्वमा बदल्ने’ तयारी

न्जिब दुलाल
भक्तपुर । डेमोक्रेटिक लयर्स एसोसिएसन (डिएलए) नेपालको महासचिव पदका लागि उम्मेदवारी घोषणा गरेका भक्तपुरका अधिवक्ता रविन्द्र प्रधानले चुनावी प्रचारलाई तीव्र बनाएका छन्। आगामी भदौ १९ र २० गते बुटवलमा हुने डिएलए नेपालको राष्ट्रिय महाधिवेशनलाई लक्षित गर्दै प्रधान यतिबेला देश दौडाहामा छन्।

महासचिव पदका लागि भक्तपुरबाट सर्वसम्मत उम्मेदवार चयन भएका प्रधानले आफ्नो उम्मेदवारीलाई व्यक्तिगत आकांक्षाभन्दा पनि संगठनलाई थप सुदृढ र प्रभावकारी बनाउने अभियानका रूपमा अघि बढाएका छन्। त्यसक्रममा उनी देशका विभिन्न जिल्लामा पुगेर कानून व्यवसायी तथा डिएलएमा आबद्ध अधिवक्ताहरूसँग भेटघाट, छलफल र अन्तरक्रियामा व्यस्त छन्।
प्रधान हालसम्म पूर्वी नेपालदेखि मध्यनेपालसम्मका विभिन्न जिल्लामा पुगिसकेका छन्। उनी झापा, विराटनगर, उदयपुर हुँदै पोखरा, नुवाकोट, धादिङ, चितवन, मकवानपुरलगायतका जिल्लामा पुगेर आफ्नो उम्मेदवारीका विषयमा कानून व्यवसायीहरूसँग छलफल गरिरहेका छन्। भेटघाटका क्रममा संगठनको आगामी कार्यदिशा, कानून व्यवसायीका पेशागत समस्या तथा डिएलएको भूमिकालाई अझ प्रभावकारी बनाउने विषयमा सुझावसमेत संकलन गरिरहेको प्रधानको भनाइ छ।
चार दशक लामो राजनीतिक तथा कानुनी यात्रा
नेपाल ल क्याम्पसमा २०४३ सालमा इकाइ कमिटी सदस्यका रूपमा विद्यार्थी राजनीति सुरु गरेका प्रधानको राजनीतिक तथा संगठनात्मक यात्रा लामो छ। उनी भक्तपुर नगरपालिकाको नगर सभापतिको जिम्मेवारी दुई कार्यकाल सम्हालिसकेका छन्।
२०६२/६३ को ऐतिहासिक जनआन्दोलनका क्रममा भक्तपुर नगर स्टेरिङ कमिटीको संयोजकको भूमिका निर्वाह गरेका प्रधान भक्तपुर जिल्ला अदालत बार एसोसिएसनको अध्यक्षसमेत दुई पटक भइसकेका छन्। उनी हाल नेपाली कांग्रेस भक्तपुर जिल्ला कार्यसमितिका प्रवक्ताका रूपमा सक्रिय छन्।
कानून व्यवसाय, लोकतान्त्रिक आन्दोलन र संगठन निर्माणमा हासिल गरेको अनुभवलाई डिएलएको केन्द्रीय नेतृत्वमा उपयोग गर्ने प्रधानको योजना छ।
“संगठनमा लामो समयदेखि काम गर्दा प्राप्त अनुभव र साथीभाइबाट प्राप्त सुझावलाई अब डिएलएको केन्द्रीय नेतृत्वमा प्रभावकारी रूपमा उपयोग गर्न चाहेको छु,” प्रधानले भने, “कानून व्यवसायीको पेशागत हकहितसँगै विधिको शासन, स्वतन्त्र न्यायपालिका र लोकतान्त्रिक मूल्य–मान्यताको संरक्षणमा डिएलएलाई अझ सशक्त बनाउन मेरो उम्मेदवारी हो।”
जिल्लाजिल्लामा भेटघाट, नेतृत्वका लागि समर्थन जुटाउँदै
महासचिव पदको दौडमा रहेका प्रधानले प्रचारका क्रममा व्यक्तिगत भेटघाटलाई प्राथमिकता दिएका छन्। विभिन्न जिल्लामा कानून व्यवसायीहरूसँग प्रत्यक्ष संवाद गर्दै उनले डिएलएको संगठनात्मक संरचना, सदस्यहरूको पेशागत समस्या र आगामी दिनमा संगठनले खेल्नुपर्ने भूमिकाबारे छलफल गरिरहेका छन्।
उनको अभियानमा “अनुभव, संगठन र समन्वय”लाई मुख्य आधार बनाइएको छ। देशभरका कानून व्यवसायीहरूसँग प्रत्यक्ष सम्पर्क विस्तार गर्दै महासचिवको जिम्मेवारी पाएमा संगठनलाई प्रदेश तथा जिल्ला तहसम्म थप सक्रिय बनाउने प्रधानको प्रतिबद्धता छ।
डेमोक्रेटिक लयर्स एसोसिएसन नेपाल लोकतान्त्रिक मूल्य–मान्यता, विधिको शासन, स्वतन्त्र न्यायपालिका तथा कानून व्यवसायीको पेशागत हकहितका विषयमा सक्रिय संगठनका रूपमा परिचित छ। आगामी महाधिवेशनले नयाँ नेतृत्व चयन गर्नुका साथै संगठनको भावी कार्यदिशा तय गर्नेछ।
भदौ १९ र २० गते बुटवलमा हुने राष्ट्रिय महाधिवेशन नजिकिँदै गर्दा महासचिव पदका आकांक्षी प्रधानको देश दौडाहाले डिएलएभित्रको चुनावी माहोललाई थप सक्रिय बनाएको छ। भक्तपुरबाट सर्वसम्मत उम्मेदवारका रूपमा अघि बढेका प्रधानले देशभरका कानून व्यवसायीको समर्थन जुटाउने प्रयासलाई अन्तिम चरणसम्म निरन्तरता दिने बताएका छन्।