काठमाडौंको ठमेलमा एक युवती बाटोमा हिँडिरहँदा अपरिचित पुरुषले ‘ब्याड टच’ गरेको भिडियो अहिले सामाजिक सञ्जालमा भाइरल छ । पीडित युवतीले आफ्नो परिचय खोल्दै घटनामा संलग्नमाथि कारवाही माग गरेकी छन् ।
आफ्नो नाम निशा बताउने युवतीले एक भिडियो जारी गर्दै उनले घटनाबारे बेलिविस्तार लगाएकी थिइन् । बाटोमा हिँडिरहँदा विपरित दिशाबाट आएको व्यक्तिले अचानक तिघ्रामा छोएको उनको भनाइ छ । भाइरल भिडियोमा पनि लामो कपाल भएका पुरुषले आफ्नो सुरमा हिँडिरहेको युवतीलाई नियतबस गोप्य अंगमा टच गरेको देखिन्छ ।
घटनामा संलग्न व्यक्ति विदेशी हुन सक्ने युवतीका आशंका छ ।
उनले घटनाको सीसीटीभी फुटेजसमेत राखेर यस्तो बोलेकी छन्-
‘म घर जाँदै थिएँ, यो मान्छेले एक्चुअली मलाई छोयो । यसले मेरो यहाँ थाइमा यसरी छोएर गयो । अनि मैले कन्फ्रन्ट गरेँ । उसले मैले छोको होइन, म त हात यस्तो यस्तो गर्दै आउँदै थिएँ, त्यही भएर हो भन्यो ।
वरिपरि अरू मान्छेहरूले पनि अलिअलि हेर्दै हुनुहुन्थ्यो । भन्दै पनि हुनुहुन्थ्यो ‘किन यस्तो गरिस्’ भनेर । तर ऊ एक्चुअली एकदमै डिनाइ (अस्वीकार) गरिरहेको थियो । थ्याङ्क गड यहाँ क्यामेरा पनि थियो । ‘क्यामेरामा देखाउँ ?’ भन्दा उसले त अझै ‘तँ पनि इन्ट्रेस्टेड थिइस्, तैँले मसँग आँखा जुधाइस्’ भन्यो ।
तर यो भिडियोमा हेर्ने हो भने मैले त्यो मान्छेलाई हेरेको पनि छैन । उसले त्यत्तिकै मलाई टच मात्र गरेको हो । यो भिडियो मैले होटलबाट पाएको हो । यो ठमेलको बाटो हो । यदि कसैले पनि यो मान्छेलाई चिन्नुहुन्छ भने प्लिज मलाई जानकारी दिनुहोला । म साँच्चै आशा गर्छु नेपाल प्रहरीले केही कदम चाल्नेछ ।
सायद तपाईंहरू धेरैले भन्नुहोला कि त्यतिबेला किन कम्प्लेन नगरेको ? त्यतिबेलै एक्सन लिनुपर्ने नि ! तर एउटा केटी मान्छेको मनमा के डर हुँदोरहेछ भने, अहिले त मसँग वरिपरि मान्छेहरू हुनुहुन्थ्यो, अब यो मान्छेले अरू बेला मलाई एक्लै भेट्यो भने, यो मान्छेले मलाई बाटोमा ‘इम्ब्यारेस’ गर्यो भनेर, त्यो मान्छेको हातमा पावर आयो भने त त्यसले झन् के गर्ला भन्ने कुरा मेरो माइन्डमा आएको थियो । त्यही भएर मैले त्यतिबेला एक्सन लिइनँ ।
यो भिडियोको कमेन्टमा गएर नेपाल प्रहरीलाई ट्याग गरिदिनुहोला । मलाई यो पनि थाहा छैन कि यो प्रकारको घटनामा के सजाय हुन्छ वा के कानुनी कारबाही हुन्छ । तर मलाई आशा छ कि यो मान्छेको अनुहार तपाईंहरू सबैले हेर्नुहोस्, चिन्नुहोस् । अनि यो मान्छेलाई चाहिँ सकेसम्म, यदि कसैलाई यसको आईडी थाहा छ भने ट्याग गरिदिनुहोला ।
सायद यो विदेशी पनि हुन सक्छ । तर म आशा गर्छु नेपाल प्रहरीले मलाई यो कुरामा सहयोग गर्नुहुनेछ र मेरो मनलाई केही शान्ति मिल्नेछ । धन्यवाद ।’
काठमाडौंका प्रहरी प्रवक्ता एसपी दानबहादुर थापाले यो घटनालाई प्रहरीले नोटिसमा लिएको र आरोपीको खोजी गरिरहेको बताए । घटनालाई लिएर कुनै उजुरी नपरे पनि सामाजिक सञ्जालमा आएको भिडिओका आधारमा प्रहरीले अनुसन्धान अघि बढाएको उनको भनाइ छ ।
के छ कानूनी व्यवस्था ?
सार्वजनिक स्थानमा महिलामाथि गरिने यस्तो हर्कत गम्भीर फौजदारी अपराध हो । नेपालको कानूनले यस्तो हर्कतलाई यौन दुर्व्यवहारका रुपमा परिभाषित गर्दै दण्ड सजायको व्यवस्था गरेको छ ।
मुलुकी अपराध संहिता, २०७४ अनुसार यस्तो घटनामा ३ वर्षसम्म कैद हुन सक्छ । अपराध संहिताको दफा २२४ (यौन दुर्व्यवहार विरुद्धको कसुर) अनुसार कसैको मन्जुरीबिना खराब नियतले संवेदनशील अङ्गमा समातेमा वा छोएमा यौन दुर्व्यवहार मानिन्छ । यो कसुर प्रमाणित भएमा दोषीलाई ३ वर्षसम्म कैद र ३० हजार रुपैयाँसम्म जरिबाना हुन सक्छ ।
प्रहरीले सुरुवाती अनुसन्धानका लागि संहिताको दफा ११८ (सार्वजनिक स्थानमा अभद्र व्यवहार) अन्तर्गत पनि मुद्दा चलाउन सक्छ, जसमा १ वर्षसम्म कैद वा १० हजार रुपैयाँसम्म जरिबानाको व्यवस्था छ ।
कसुरदार ठहरिएमा अदालतले पीडित युवतीलाई परेको मानसिक चोटबापत दोषीबाट उचित क्षतिपूर्ति समेत भराइदिने कानूनी प्रावधान छ । ठमेलको सीसीटीभी फुटेजमा आरोपीको हर्कत स्पष्ट देखिएकाले प्रहरीले पक्राउ गर्नासाथ उनीविरुद्ध यौन दुर्व्यवहार अन्तर्गत मुद्दा चल्ने बलियो कानूनी आधार देखिन्छ ।
